1- #أولا_فاش_قام_تفعل_في_الفصل_ثمانين وتحل في البرلمان، كانوا مفرهدين على الشعب ونسب مشاهدة مسرحيات الجلسات فاقت جميع القنوات، صحيح ما عداوش قوانين لصالح الشعب أو لمقاومة الفساد أو للتأسيس لعدالة جبائية، آما معذورين، ما ينجموش يقطعوا أرزاق ممولي حملاتهم… صحيح فما برشا عنف وصراعات وتراشق بالتهم، آما يمثلوا حقيقة غالبية الشعب، ياخي جبناهم من المريخ واللي جاك جديد العنف في البلاد، تي هو سال الدم وإغتالوا الشهداء وما تحلّش البرلمان….
2- #ثانيا_فاش_قام_تعلق_في_الدستور_وتنقح_فيه، راهو أقوى دستور في التاريخ يجرد الرئيس المنتخب مباشرة من الصلاحيات ويضعها بين أيادي الاحزاب النافذة لترهن رئيس الحكومة في المحابات والمحاصصات… دستور ديمقراطي يقاوم تجميع السلطات ويفتتها بين جميع المتدخلين، صحيح يعطل القرارات والمشاريع وتحديد الخيارات، آما ديمقراطي وما فيهوش حتى تداخل بين السلط أو تجاوز للنفوذ من المتنفذين السياسيين، والقضاء مستقل وغير مخترق والقضايا الكبرى اللي شادين فيها التوانسة ياخي باللزمة نفصلوا فيها، ما هيش أولوية، في الأخير الشعب ياكلها في عظاموا ويكبر وينسى……
3- ثالثا، #فاش_قام_تحب_تعدل_المجلة_الإنتخابية_وطريقة_الإقتراع، علاش ناوي تحب إطلع كفاءات للمجلس، مالحاجة لذلك، رئيس الكتلة ورئيس الحزب يعرف ما يصلح بالبلاد والعباد والبقية يمتثلون ويضغطون على الازرار،،، وجماعة الفلوس والتهريب شكون بيهم وشكون يمثلهم… تحب تنحي أفضل البقايا وتسكر اللعب على اللي طالعين بالدزان… شادين في المال السياسي الفاسد والتجاوزات الإنتخابية، هاذي أحزاب عندها صيت دولي وتجيها المساعدات والهبات من كل بلاصة، ما تقليش اجندا ومحاور، نقولوا مصالح وشراكة…
4- رابعا، #فاش_قام_تقيل_في_أنجح_حكومة، صحيح ما جابتشي التلاقيح للتوانسة وماتو في عهدها آلاف الأبرياء لنقص الأكسيجان وإرتفعت الأسعار وإنتشر الفقر والفرعنة والميزانية عاجزة وما عملتشي قانون مالية تكميلي، ما هو نصبروا عليها لين تتحسن وتتجاوز عجزها، ياخي الفشل جديد علينا، ما هو تعودنا عشرة سنين وفي الآخر نبقاو وخيان توانسة ونعديو لبعضنا…
5- خامسا، #فاش_قام_تعلن_في_حرب_على_الفساد، نسيت إنو الفساد مسيطر على نصف الإقتصاد ويخلق في مواطن الشغل ويساهم في النمو والتنمية وفيه شكون يقدم في المساعدات ويوزع في الماكارونا على الفقراء…. ياخي كيف تقاوم الفاسدين والمحتكرين والمهربين والمتلاعبين بالمال العام شكون مش يشدلنا البلاد ويلقاولنا الحلول ويضمنولنا الشهاري تتصب كل شهر،…
6- #فاش_قام_تبدّل_تركيبة_الهيئة_المستقلة_للإنتخابات صحيح قبل خمسة وعشرين جميع الأحزاب بإستثناء الحزب الاغلبي، كانت تشكك في مصداقيتها وإستقلاليتها آما ماتنساش إني منتخبة من البرلمان يعني عندها الشرعية والمشروعية والمديونية والجرأة باش تعاقب وتسقط قائمات الاحزاب، صحيح الاحكام تصدر بعد عشرة و15 عام كان صدرت من اصلوا آما ما يقلقش، يكون البرلمان كمل وخلط عليه اللي بعدو بنفس الاغلبية ومنو فيه زيتو يقليه وعليها آمان الله والناس الكل محصنين مضمنين، نعملوا ضريبة نقد وتشكيك لإستهلاك الجمهور ىما في الحقيقة رانا متفاهمين، فقط نقسموا في الأدوار….
7- #فاش_قام_ترفع_في_شعار_الشعب_يريد، ياخي مشكلة تونس الشعب يريد وإلا مايريدش، ياخي الشعب ماهو صوت نهارة الإنتخابات، يزيه، يستنى خمسة سنين، علاش مزروب… وزيد هذا ودونه، ناوي تستفتي الشعب في النظام السياسي والإنتخابي…ياخي الشعب يعرف أكثر من السياسيين والأحزاب شنوة يصلح بيه وشنوة النظام الأصلح ليه، ومن وقتاش الشعب في تونس يقرر ما يصلح بيه… وما تقليش اللي خرجوا متظاهرين نهارة 25 واللي خرجوا فرحانين في الليل بعد القرارت يمثلوا الشعب، هاذوكم ناس إنفعاليين، شعبويين وموش فاهمين وزيد ما همشي نخبة وماهمشي من الحقوقيين…
8- #فاش_قام_عليك_تعزل_في_القضاة، وين المشكل كان القضايا الإرهابية ماتفصلتش، وين المشكل كان الحيتان الكبيرة ماتحاكمتش، وين المشكل كان الحقيقة ماظهرتش، تي ماهو نعملوا لجنة تخرج منها توصيات ونستناو أول مشكلة جديدة نعملولها لجنة تنسي الشعب في المشكلة القديمة….
9- #كيفاش_تتطاول_على_خبراء_البندقية، راهم لجنة مستقلة ما هيش مسيسة بالكلّ وفيهم أكبر الخبرات في الديمقراطية، حتى آخر زوز إنتخابات في عهد المرحوم بن علي خرجوهم في قمة الشفافية… وبعد هذا ودونوا وين المشكل كيف يدخلوا في السيادة التونسية ياخي من وقتاش عندنا سيادة وأحنا عايشين على الإعانات الأجنبية….
10- #فاش_قام_تقصي_الاحزاب_اللي_حكمت_قبل_خمسة_وعشرين_من_الحوار، هاذا كفوهم عشرة سنين يخدموا في البلاد وفي الديمقراطية… وزيد كيف تعزل أكبر حزب في البلاد شنوة مصير باراشوكاتها واللي متقاسمين معاه الغنيمة واللي في حمايتها وحصانتها… واللي كانو عايشين على مهاجمتها، شكون مش يهاجموا تويكا، ماهو مش يدوروها عليك إنتي… وزيد هذا ودونو، راهم الأكثر خبرة ودراية بمنظومة الفساد والتحيل وقادرين يحيدوها في دقيقة على شرط نبيضوهم ونخلي مسؤوليتهم، صحيح كانوا راسين في شاشية مع الفساد والترهيب والتهريب والموازي، آما في إطار السلم الإجتماعي وسياسة التوافق والتحصين السياسي….#فاش_قام_عليك، هذا الكلّ، عملت كيف المراحيم وتحالفت معاهم وراك شايخ، الأحزاب الكل تبشبش بيك ولا ندوات ولا بيانات ولا تهديدات بالمقاطعة…. موش كان عملت حوار وطني شاركوا فيه الفاشلين الكل وخرجوا منو بخارطة طريق يبيضوا بيها مسؤولية العشرة وسنين ويخدموا بيها خمسة سنين اخرين، موش كان خير…
