كتب النائب السابق بمجلس نواب الشعب ياسين العياري في تدوينة على صفحته الرسمية بموقع التواصل الإجتماعي فيسبوك اليوم الثلاثاء 18 أفريل 2023، أن الدولة أصبحت تظلم أبناءها، في إشارة إلى عملية الايقاف التي طالت أمس رئيس حركة النهضة راشد الغنوشي، واختتم التدوينة بـ “ويل للظالمين”.
وفي ما يلي نص التدوينة:
بعد 631 يوم من الإنقلاب، بعد أبحاث معمقة تجندت لها كل الدولة، شملت كل شيء، دوروا الغنوشي. لقاوه سارق؟ لا.. و المليارات ؟ والدولارات؟ والشليارات؟ ماو قلنا ما لقاوش.. لقاوه متورط في تسفير، إرهاب؟ أبدا! والوثائق وشكري والجنود؟ قتلك ما لقاو حتى شيء امالة باز عمالة؟ خيانة؟ وهالعواشر، ما خلاو وين لوجو، و ما لقاوش حكاية ملي تحكي فيه! إمالة لقاوله جرائم طرقات؟ حارق ضو، صطوب، مجاوزة ممنوعة؟ شي قتلك. إحتكار؟ بنان؟ قرط؟ لا! تي إمالة فسرلي علاش دوروه في هالعواشر، عمرو 80 عام ومداهمة وأفلام؟ قلك ثمة تسريب يحكي فيه قال، إنه إقصاء الأطراف السياسية ينجم يقود لحرب أهلية.
تحكي بجدك؟ مثبت؟ إي إي.. هذاكا إش قالت النيابة. معناها ظلم في ظلم؟ سياسة! بالضبط! و العباد هاذم الكل فرحانين بالظلم يعني؟ إي نعم. مليح. كنت سأفرح مثلكم كان توقف الغنوشي سارق، إرهاب، خيانة، تي حتى إحتكار، ماهوش فوق القانون. لكن، الله غالب، لا أصلي لا تربيتي، لا الي صار عليا (تظلمت كثيرا) يسمحولي بش نفرح بالظلم، لأي كان، حتى للي ظلمني.
الي يفرح بالظلم، مستحيل يكون إنسان سوي. في هالعواشر والليلة الفضيلة : يا رب، كل من فرح بظلم، كل من أعان ظالما، كل من ظلم وهو يعلم أنه يظلم، مهمن كان، أذقه من العدالة وأعطيه على قد فعله وعلى قد قلبه، اللهم آمين. الظلم ظلمات!
طوبى للمظلومين وويل للظالمين.
#القرية_الظالم_أهلها
