علّقت الناشطة الحقوقية والمستشارة الرئاسية السابقة سعيدة قراش، على ملفّ الهجرة غير الشرعية.
وتحدّت قرّاش عن تعامل الرئيس الراحل الباجي قائد السبسي، مع هذا الملفّ خاصة في علاقة بمحاولات جعل تونس تلعب دور شرطي الحدود البحرية لأوروبا مقابل إغراءات مالية.
وقالت: “هاك العام، البجبوج الله يرحمو في اجتماع مع الجالية التونسية بإيطاليا و على هامش الزيارة الرسمية التي أداها لإيطاليا، بعد ما رحب بالتوانسة و فدلك معاهم ، قالهم توا قداش عددكم هنا، جاوبوه و اعطاووه العدد الرسمي المصرح به، قالهم نعرف ان العدد اكبر (في اشارة الى الهجرة غير القانونية) ، نحب نقوللكم حاجة ، الله غالب نعرف ان الدولة غير قادرة باش تحققلكم احلامكم و توفرلكم خْدِم و الظروف صعيبة، اخدمو على رواحكم و ردو  بالكم راهو الّي يشدوه يرجعوه و ما نجمش نقول لا ما كم تعرفو القانون.
و كان وين يجي مسؤول اوروبي للحديث على الهجرة غير الشرعية و يطرح جملة إغراءات مادية مقابل لعب دور شرطي الحدود البحرية لأوروبا كان يجاوبهم : تحبو حل للمشكلة هاذي ايجاو نراجعو علاقات دول جنوب البحر الابيض المتوسط بدول شماله. و نطرحو مشكلة استغلال الثروات و تبعات الاستعمار و علاقته بهذا الموضوع و نأسسو لعلاقة تعاون حقيقي و جديدة ، توا تنتهي المأساة متاع دول الجنوب و تنتهي مشاكل دول الشمال.
هذا كان جوابو للايطاليين و الالمانيين و الفرنسيين و غيرهم عندما كانو يطرحو فكرة ان يقع انشاء مراكز خاصة بالمهاجرين العابرين لتونس نحو اوروبا مقابل تمويلات مهمة.
كتبت هذا و التوانسة الحاضرين في الاجتماعات و اللقاءات التي اشرت إليها وقتها يشهدو
كتبت هذا ردا على انصار فكرة ان تلعب تونس دور شرطي حدود لأوروبا!
ما خمموش في حرقة الناس الّي فقدو اهلهم وفلذات اكبادهم واختارو يواجهو الموت بحثا عن أمل في غدوة و موش بالضرورة يكون فلوس فقط.
يحبو يكونو عسّاسة على العباد واحلامها وبالوكالة. جملة تعاليق مقرفة في شكل حملة ما فيها حتى شعور بنخوة الانتماء وعمق مشكلة الإقبال اللافت على الهجرة بنوعيها المنظمة وغير المنظمة اي الهجرة الشرعية وغير الشرعية.”
