دعا الدكتور ذاكر لهيذب إلى الحذر خلال الأيام القادمة وذلك في تدوينة له على صفحته الشخصية على الفايسبوك، حيث اعتبر أن ولاية صفاقس اليوم مهددة بما أسماه «إنفجارا وبائيا» مطالبا الحكومة واللجان المختصة بضرورة الإسراع في اتخاذ قرارات لفائدة الجهة خصوصا بالتزامن مع العودة المدرسية و الجامعية.
هذا وقد كتب الدكتور ذاكر لهيذب يقول: «براس والديكم الحكومة واللجان الكل بعد ما ترجعوا تخدموا خذوا قرارات في صفاقس. ثلاثة اسابيع بالضبط بعد أزمة الغاز، انفجار وبائي في ثاني أكبر مدينة تونسية وعاصمتها الاقتصادية.
شكون يتحمل المسؤولية ؟؟؟
باهي موش مشكل ماحاجتناش بشكون السبب حسيبو ربي ، أما أعملوا قرارات ، أعملوا اجتماعات في العطل والمناسبات ويوم الأحد .
غدوة باش يرجعوا المدارس والجامعات في صفاقس أم لا؟؟؟
وغدوة كيف يرجعوا الجامعات للتدريس ويتنقل الطلبة من بقية الولايات الى صفاقس وتجيهم بعد اسبوع وتقول إيقاف التدريس، باش يرجعوا الى ولاياتهم لنشر الفيروس.
غدوة طاقة الاستيعاب للمستشفيات حاضرة ام لا ؟؟؟
عندكم الكمية اللازمة من التحاليل وطاقة استيعاب مخابر وإلا لا ؟؟؟
الحالات المؤكدة باش تخليها في البيت والا باش تحطها في الحجر الصحي وفي أي مكان؟؟ نظريا التنقل بين الولايات ممنوع باش اطبقوه على ولاية صفاقس أم لا ؟؟؟ بلدية صفاقس اعملوا اجراءات اما براس والديكم لا تعملوا تعقيم للشوارع والادارات راهي ما عندها حتى تفسير علمي وخسارة الفلوس بلاش فائدة ( الفلوس وزعوا بيهم كمامات مجانية على المواطنين)….
سكان المدينة ربي معاكم وان شاء الله شدة وتزول”.
